05/03/2025
ນະຄອນຫຼວງພະບາງ ໄດ້ຮັບລາງວັນ ເລື່ອງລາວຈຸດໝາຍປາຍທາງການທ່ອງທ່ຽວທີ່ຍືນຍົງຂອງໂລກທີ່ ດີເດັ່ນ ສໍາລັບປີ 2025 (2025 Green Destinations Top 100 Story Awards) ອັນດັບທີ 03 ໃນໝວດ “ການ ບໍລິຫານຈັດການ ແລະ ຄຸ້ມຄອງຈຸດໝາຍປາຍທາງການທ່ອງທ່ຽວ (Destination Management)” ທີ່ຮັບຮູ້ເຖິງ ຄວາມສໍາເລັດໃນການພັດທະນາການທ່ອງທ່ຽວທີ່ຍືນຍົງ ຫຼື ການປັບປຸງຄືນໃໝ່ໃຫ້ດີຂຶ້ນ, ການຄຸ້ມຄອງ ການທ່ອງທ່ຽວ ແລະ ການຟື້ນຟູຫຼັງວິກິດການ.
ໂດຍການໃຫ້ຄະແນນຈາກທົ່ວໂລກ ໃນງານມະຫະກຳ ການທ່ອງທ່ຽວໂລກ ITB Berlin 2025 ໄດ້ຈັດຂຶ້ນໃນລະຫວ່າງວັນທີ 4 - 6 ມີນາ 2025 ທີ່ນະຄອນຫຼວງເບີລິນ ປະເທດເຢຍລະມັນ. ເຊິ່ງລາງວັນດັ່ງກ່າວ, ແມ່ນຜົນສືບເນື່ອງມາຈາກ ການໄດ້ຮັບລາງວັນ ໜຶ່ງໃນຮ້ອຍເລື່ອງລາວ ຈຸດໝາຍປາຍທາງການທ່ອງທ່ຽວທີ່ຍືນຍົງຂອງໂລກ (Top 100 Destination Sustainability Awards) ຂອງອົງ ການທ່ອງທ່ຽວສີຂຽວ (Green Destination) ໃນງານປະຊຸມຈຸດໝາຍປາຍທາງການທ່ອງທ່ຽວສີຂຽວສາກົນ ທີ່ ປະເທດຊິລີ ປີ 2024.
ລາງວັນດັ່ງກ່າວ ແມ່ນໝາກຜົນຂອງຄວາມພະຍາຍາມ ໃນການປົກປັກຮັກສາມໍລະດົກໂລກ ແລະ ພັດທະນາການທ່ອງທ່ຽວ ຂອງອົງການປົກຄອງແຂວງ ທີ່ເລັງເຫັນຄວາມສໍາຄັນໃນການພັດທະນາແບບຍືນຍົງ ພາຍໃນແຂວງ; ທັງແມ່ນຄວາມພາກພູມໃຈ ຂອງຊາວຫຼວງພະບາງ ເວົ້າລວມກໍຄືຂອງປະເທດ ເຊິ່ງເປັນການໄດ້ຮັບ ລາງວັນຄັ້ງທໍາອິດຂອງຊາດ ແລະ ເປັນຊາດທຳອິດທີ່ໄດ້ຮັບລາງວັນໃນບັນດາປະເທດ CLMV (ກຳປູເຈຍ, ລາວ, ມຽນມາ ແລະ ຫວຽດນາມ).
ສໍາລັບແຜນທິດທາງປີ 2025 ແມ່ນຈະສຸມໃສ່ປັບປຸງຕາມເງື່ອນໄຂ ແລະ ຕົວຊີ້ວັດໃນແຕ່ລະດ້ານ ເພື່ອສະ ເໜີຂໍການຢັ້ງຢືນຮັບເອົາ ຫຼວງພະບາງເປັນຈຸດໝາຍປາຍທາງການທ່ອງທ່ຽວທີ່ຍືນຍົງ (Green Destination Ceritfication) ຈາກອົງການທ່ອງທ່ຽວສີຂຽວ; ເຊິ່ງແມ່ນອົງການນໍາໜ້າໃນດ້ານການຢັ້ງຢືນຄວາມຍືນຍົງ ໃຫ້ແກ່ ຈຸດໝາຍປາຍທາງການທ່ອງທ່ຽວ ແລະ ຜູ້ປະກອບການທຸລະກິດໃນທົ່ວໂລກ ທີ່ຖືກຮັບຮອງໂດຍ ສະພາ ການທ່ອງທ່ຽວໂລກ ຫຼື GSTC (Global Sustainable Tourism Council). ສໍາລັບມາດຖານຂອງຈຸດໝາຍ ປາຍທາງການທ່ອງທ່ຽວແບບຍືນຍົງ ປະກອບມີ 06 ໝວດຄື: 1) ການບໍລິຫານຈັດການ ແລະ ຄຸ້ມຄອງຈຸດໝາຍ ປາຍທາງການທ່ອງທ່ຽວ; 2) ທຳມະຊາດ ແລະ ທັດສະນິຍະພາບ; 3) ສິ່ງແວດລ້ອມ ແລະ ສະພາບອາກາດ; 4) ວັດທະນະທຳ ແລະ ຮີດຄອງປະເພນີ; 5)ຄວາມເປັນຢູ່ທີ່ດີຂອງຄົນໃນສັງຄົມ; ແລະ 6) ການປະກອບທຸລະກິດ ແລະ ການສື່ສານ.
#ແຂວງຫລວງພະບາງ
#ຮັບລາງວັນການທ່ອງທ່ຽວທີ່ຢືນຍົງຂອງໂລກ
#ນະຄອນຫຼວງພະບາງ
#ພະແນກຖວທແຂວງຫຼວງພະບາງ
#ສະຖານີວິທະຍຸໂທລະພາບແຂວງ
#ຂ່າວສານຫຼວງພະບາງ
#ທ່ອງທ່ຽວຫຼວງພະບາງ
#ມໍຣະດົກໂລກ
