16/11/2026
Ons groet ‘n ware legende.
Werner, jy was soveel meer as net ’n werkskollega. Jy was ’n hartsmens, iemand met ’n besondere plek in die harte van dié wat die voorreg gehad het om jou te ken en saam met jou te werk.
Al was jy deel van Brand Republic, was jy ook deel van ons AFGRI-familie. Die bande wat ons oor jare gebou het, strek soveel verder as werk en besigheid. Dit is gebou op vriendskap, opregtheid, gedeelde herinneringe en ’n besondere menslikheid.
Vandag kyk ons na die son met sy pragtige kring daaromheen, en ons kan nie anders as om aan jou te dink nie. Jy het altyd die mooi in die lewe raakgesien en dit vir ander gegun. Jy het die vermoë gehad om lig, warmte en vreugde te bring en ons te herinner dat die son vir almal skyn.
Jou omgee-hart, jou grappies, jou passie en jou besondere menswees sal ons altyd bybly. Die leemte wat jy laat, is groot en jou afwesigheid sal diep gevoel word.
Namens AFGRI wil ons ons innigste simpatie betuig aan jou familie en geliefdes, die hele span van Brand Republic en Landbouweekliks, asook al jou kollegas, vriende en almal wat die voorreg gehad het om deel van jou lewe te wees.
Mag julle in hierdie ongelooflik moeilike tyd vertroosting vind in die mooi herinneringe en die wete dat Werner ’n blywende merk op soveel mense se lewens gelaat het.
Sommige mense se lig verdwyn nooit nie. Dit bly voortleef in die harte van dié wat hulle agterlaat.
Rus sag, Werner. Jy sal onthou word. 💙