10/07/2020
عجينة السكر 🤔🤔🤔
ناس كتير مبتحبهاش وبتقول طعمها مش حلو وتورتة الكريمه احلي بكتير ... من مزايا عجينة السكر انك تقدر تشكلها زي ما انت عاوز وتعمل كيك اقرب للحقيقة لدرجة انا اللي يشوفها ميصدقش انها كيكه اصلا 😱 ... الاطفال بيحبوا طعمها جدا جدا جدا 😍 علشان هما بيحبوا اي حاجة مسكره طبعا 😁 ... انا عملت بيها كيك كتيرا جدا
بالنسبه لطريقة عجينة السكر ... انا عموما بشتريها جاهزه من عند اي حد بتاع لوازم الحلويات سعرها معقول وموجود منها الوان كتير ... عموما هكتب الطريقة برضه للي يحب يجربها مع اني بفضل عجينة الشيكولاته سواء الدارك او البيضا لانها طعمها احلي واسهل كمان لو حبيتوا تعملوها في البيت بس مشكلتها ان استخدمها صعب شوية عن عجينة السكر و ان شاء الله هنزل طريقتها هنا برضه
مكونات عجينة السكر:
٦٠ ملل مياة - ١٤ جرام جيلاتين بودرة - ١٨٠ جرام جليكوز - ١٥ ملل جلسرين (اللي بيستخدم في الاكل) - ١ م/ك زيت - ٩٠٠ جرام سكر بودرة - ١٠ نقط فانيليا/او كيس فانيليا - ألوان طعام
الطريقة:
*نضيف الجيلاتين في بوله ونضيف عليه المياة ونقلب لحد مايشرب المياة كلها
*نحط البولة علي حلة فيها مياة علي النار ونقلب لحد ما الجيلاتين يدوب خالص وبعدين نضيف الجليكوز والجلسرين والزيت ونقلب كويس بس منخليش الخليط يغلي
*نحط السكر البودره في العجانه ونركب قطعة العجن اللي شبه الهوك بتاع الصنارة ونضيف عليه خليط الجيلاتين والفانيليا ونقلب علي سرعه بطيئة لحد ما السكر يشرب السوائل كلها ويبقي شبه العجين
*نغلف العجينه بالاسترتش علشان ماتنشفش
*لو هنضيف لون يبقي الافضل نلبس جونتي وندهنه بالزيت وندهن السطح اللي هنشتغل عليه برضه زيت
*ناخد جزء من العجين ونضيف عليه اللون ونفضل نعجن لحد مانوصل للون المطلوب
*لو هنبدأ في لون تاني نغير الجونتي وننضف السطح اللي هنشتغل عليه ونبدأ بنفس الطريقة
*ملحوظة مهمه: عجينة السكر مبتتخزنش في التلاجه
*علشان نفرد العجينه بنستخدم سكر بودرة او نشا بس منكترش علشان ممكن ينشف العجينه مننا
