31/03/2026
聚有時 散有時
好多嘢都有定數，估唔到今日連一張紙都留唔住💔
之前任何部門嚟到講啲咩或者提醒啲咩我都唔會出post講，但係今次呢d係屬於客人送俾我哋嘅支持同祝福我都想同佢地講聲唔好意思🙇🏻♂️，我唔想啲客人下次嚟到見到無左🔖，以為我專登掉咗佢哋啲嘢
之前有執法部門人員落嚟提醒我地個黑板上邊有啲敏感嘅嘢要清走佢，我都好合作清走咗，但隔咗一排今日再落嚟話我點解仲有啲敏感踩界嘅嘢放喺度。
原來就係講緊呢啲客人寫俾我哋嘅支持同埋祝福語。佢要我搣走佢，我當時個心真係好痛❤️🩹
第一痛係因為喺我角度呢啲只係客人留俾我哋嘅支持，鼓勵同認同，我都明白部門人員都有上頭交俾佢哋要做嘅嘢，唔緊要我清，客人嘅支持用另一個形式留喺我心入面👊🏻
第二痛係我哋只係一間雞毛蒜皮、可有可無、豆膶咁細嘅一間小店，為咗我哋店入邊嘅一張紙，值得放咁多心機咩？香港啲大決策者係咪成日放錯晒重點呢，如果當日可以將呢啲心機人力物力放去了解吓啲居民真正需要調查吓啲投訴方向，宏福苑件事其實係咪可以早啲了解到個危險性？可以避免…….？件事係個個都感覺到唔對路，但投訴無門，個個部門都話唔關佢事，聽到都感受到嗰種無助。
算啦都夜啦唔打咁多字啦，今日post最主要都想同之前係黑板留低咗支持同祝福語嘅客人講聲唔好意思🙏🏻🙏🏻🙏🏻我知你哋會明嘅🙂（雖然好多我都唔記得咗幾時同埋邊個留低😂😂）但真心多謝你哋嘅支持，我已經用另一種形式永遠留低🙂
多謝睇晒
