05/06/2026
致一直陪伴 Phoenix Sweets 嘅朋友：
一段充滿不捨但又美好嘅旅程，嚟到要同大家講再見嘅時候喇。🥺
由 2012 年創立以嚟，由一開始廚房小焗爐，到門市開過上環 PMQ、銅鑼灣 Fashion Walk、旺角 MOKO，再到中環大館。呢 14 年嚟，我哋好榮幸為客人製作過超過 10,000 個蛋糕，差不多每一間熱門婚宴酒店我哋都有幸送過結婚蛋糕，高高低低好慶幸有大家陪住我哋。
我哋一直用心設計同製作每一件作品，堅持帶俾大家最靚嘅賣相、最好嘅味道。不過，面對香港日益嚴峻同充滿挑戰嘅營商環境，我哋作出咗一個好艱難嘅決定：Phoenix Sweets 香港店將會結束營業。
我要特別多謝咁多年黎跟我哋一齊奮鬥嘅好同事，感謝你哋一直盡心盡力，由每塊曲奇每個蛋糕，將Phoenix Sweets嘅出品做到最好！
想把握最後機會，品嚐我哋主打少甜、口感豐富紮實、濕潤又濃郁嘅傳統 Victoria Sponge 牛油忌廉蛋糕？香港店嘅最後取餅日期會定於 7 月頭。
因為所有蛋糕都係全人手精心製作，名額有限，大家記得要提早最少 1-2 星期預訂呀！至於最新嘅供應款式同價錢，為確保準確，可以直接去我哋官方網店睇睇。
雖然香港店即將結業，但我哋對烘焙生活嘅熱誠絕對唔會減退。我哋嘅社交平台會繼續維持運作，同大家分享我哋喺澳洲 同香港兩地嘅烘焙生活日常。香港依然係我哋嘅重點，如果大家有趣嘅諗法可以合作，記得預埋我哋呢！✨
Stay tuned!
Phoenix
