27/10/2020
今日10月27號。。呢一日對於我黎講有咩咁特別？
特別在於今日係Sage最後一日營業嘅日子。。
我有好多嘢想講，但係又唔想咁長氣。。
首先，當然要多謝我老闆Emily Li同佢老公D Gor，無呢兩位就無Sage，無Sage就無我。。呢兩位係我人生教練，教識我好多嘢。。更無私地俾左Sage我，在於我立場，當然想一路承傳落去啦。亦都要多謝每位曾經黎過Sage幫手嘅好朋友。初頭雞手鴨腳，要成10點幾先出主菜，到後期咋咋聲就出到主菜，全靠各位嘅配合，各位嘅合作。。
不過人始終要面對現實，由今年年頭開始嘅疫情對小店生意影響真係好大，我由第一波捱到第二波尾其中爭啲結業，但係第二波尾嗰時見生意好轉，又得到客人鼓勵同支持，決定繼續營運落去。。
可惜第三波又開始爆發，什麼限聚令，什麼禁夜市，通通都令到我生意大減，加上小女剛剛出世，我更加唔敢搏落去。。所以今次响無宣布下結束營業。
當中有好多客人大感可惜，話好唔捨得呢個地方。不過我可以話俾大家知。。我嘅唔捨得係比大家多一千倍，甚至一萬倍。呢度陪伴左我7年，由呢度開檔，到而家結業，我都有份見證每一個重要時刻。
最後多謝呢7年黎，每一位黎過晚餐嘅客人，甚至乎成為左好朋友嘅每一位。。多謝你地陪伴住Sage嘅成長。。希望第時有機會再為大家準備豐富嘅晚餐。。有緣再見❤️
