15/02/2014
Vandag in Die Burger:
Dorpstraat@summerhill
Bolandse teater sluit sy deure
‘Eikestad armer’
Willem de Vries
Saterdag 15 Februarie 2014
KAAPSTAD. – Die Dorpstraatteaterrestaurant, jare lank ’n instelling vir die kunste in die Boland, sluit middel-Maart vanjaar sy deure.
Prof. Dorothea van Zyl, voorsitter van Stellenbosch 360 se kuns-, kultuur- en erfeniskomitee, sê die sluiting van die Dorpstraat-teaterkafee is “baie negatief in die lig van die kultuurbedrywighede op Stellenbosch”.
“Hierdie gewilde kultuur- en kuierplek het mense altyd deur die hele jaar die geleentheid gebied om binne ’n intieme ruimte nader kennis te maak met vooraanstaande musiek- en ander kunstenaars. Die sluiting laat Stellenbosch aansienlik armer op kultuurgebied.”
Die teaterrestaurant bestaan sedert die 1990’s en is een van die oudstes in die land.
Dit het in 2009 van Dorpstraat in die Stellenbosse middedorp na die Summerhill-wynplaas op die R44 tussen Stellenbosch en die Paarl verhuis.
Volgens die eienaars van Dorpstraat@Summerhill, Michelle Nolte en Anita Bredenkamp, is “met groot verwagting uitgesien na die suksesvolle voortsetting van die Dorpstraatteater op die wynplaas Summerhill, net buite die dorp”.
“Daar is geen moeite, koste, sweet of laat aande ontsien om die teater in te rig sodat ’n nuwe omgewing geskep kon word waar akteurs en musikante hul gehore steeds op die hoogste vlak kon vermaak nie.”
Die edel werk om geleenthede te skep vir die vertoon van talent, lewer min dividende op vir onafhanklike vervaardigers en teatereienaars, sê sy.
Hul evaluering van die afgelope vier jaar se bestaan van die Dorpstraatteater buite Stellenbosch, teenoor ’n perseel op die dorp, het hulle laat “besluit om die Dorpstraatteater te verkoop en sal dit voortaan nie meer as ’n teater bedryf word nie”.
Die US Woordfees het die Dorpstraat-teaterrestaurant as lokaal vir Filosofiekafees ingespan. Dit was telkens volbespreek. Vanjaar word die Filosofiekafee egter in die opelug-feesrestaurant De Vette Mossel aangebied.
“Die US Woordfees betreur die feit dat die Dorpstraat-teaterkafee binnekort ophou om te bestaan,” het Van Zyl, direkteur van die fees, gesê.
“Die Woordfees het ’n vriendskapsverhouding met hierdie kultuurrestaurant wat oor baie jare strek, vanaf die tyd toe Hettie Dollenberg en Elbie Adendorf dit baie suksesvol in Dorpstraat bedryf het.
“Dit is voortgesit toe die restaurant en sy bedrywighede moes verskuif na die huidige ruimte buite Stellenbosch, wat ongelukkig nie alleen meegebring het dat mense gewoond moes raak aan die nuwe plek nie, maar wat hulle ook blootgestel het aan heelwat inbrake.”
Verlede jaar het die restaurantteater talle kere onder diewe deurgeloop. Binne tien dae is onder meer as R60 000 se skade berokken, het Raymond Willemse in Oktober verlede jaar berig.
Laaste optredes
Dorpstraat se program voor sy sluiting is soos volg:
•Op 21 Februarie - Natalie Chapman, op 28 Februarie - Jerome & Geselskap, op 1 Maart- Kanoeksie & Kadoeksie-kinderteater, op 7 Maart - Gert Vlok Nel, op 8 Maart - Luna Paige en Gerald Clark, op 9 Maart - Lieze Stassen, op 14 Maart - Elzahn Rinquest, Jesse Jordan en Hildandi Du Toit, en op 15 Maart - Valiant en Vriende.
Bespreek by 021 889 9158.
